活動消息

小天使家庭新春團拜(年初五) 2025

返回

年初五…

小天使家庭又再聚首一堂，團拜問好，祝願各小天使及家庭一切順心、身體健康 、心想事成、闔家平安！
多謝Taste ‧ Gourmet Group Limited 老闆娘嘅安排、愛錫及款待我哋一班天使家庭… 令我哋有一個咁好嘅塲地、美食及氣氛，歡渡佳節；眾所周知，小天使外出食飯比較困難，今年我哋破天荒帶天使家庭去食火鍋，確實一個難忘嘅體驗….特別要多謝葵芳新都會山見台式火鍋Katy及Kelvin嘅配合及準備，無論美食飲料、甜品供應，以至座位安排、設施配套及服務質素都非常好，個個都激讚

當然唔少得鳴謝特別撥冗出席嘅兩位顧問陳總監及樊總監；以及內委成員德仔 Sir、Joyce及Alex，令活動生色不少！仲有今次擔大旗嘅印媽

再一次祝賀大家新年進步、事事如意、生活愉快！HKASF 同人敬賀！

日期 : 02-02-2025

時間 : 1400 - 1730hrs

地點 : 山見台式火鍋

查詢 : info@hkasf.org / +852 5125 8111

初五團拜，竟然可以帶領一班天使家庭去打邊爐，真係好滾…滾….滾…. 動

起初嚐高美接頭人Virginia提議我哋去山見台式火鍋，我既驚又喜，一方面，搵到一間咁舒適及高質素嘅餐廳去搞活動，地點仲要咁方便，開心到不得了；但另一方面，食火鍋…..對於我哋嚟講又談何容易？

坦白講，要帶一個天使綜合症嘅病患者去打邊爐，涉及好多安全及自理嘅問題，真係諗吓便算；要帶一班小天使及家庭一齊去外出打邊爐，先唔講價錢，家長嘅疑慮，餐廳嘅環境，同事嘅配合，好多風險性嘅評估問題，簡直係痴心妄想！
Joson…. 都係飲餐茶算啦，唔好搞咁多嘢……..
琴日落去睇完場，再同餐廳經理Katy分享咗我哋嘅背景，傾咗好多風險性嘅評估及細節，戰戰兢兢嘅我突然充滿能量，有佢哋嘅支持及協助下，我好有信心及憧憬可以帶領一班天使家庭再次去嘗試及挑戰新里程…旁人眼中平常不過嘅事情，但對於我哋嚟講卻有說不出的感動及激動！

我哋特意揀下午茶時段，人流比較少，我哋40人佔用60人嘅地方，而且自成一角，時間加長至兩個半鐘，務求令所有天使家庭都可以享受過程及有足夠時間互相問好及交流，希望可以帶俾小天使家庭多啲唔同嘅新體驗！

人間有愛，老闆娘嘅親和力，感染到帶領嘅團隊及同事都有嗰份同理心，真心欣賞及動容，令我哋從不孤單，不再是社會及世俗被遺棄嘅一群，小天使家庭都可以有正常社交嘅權利！當然要讚賞Virginia 及Katy嘅細心聆聽、接納及配合，協助我哋去實踐一個壯舉！
香港經營環境仍處於水深火熱，大家各自有自己嘅困難及壓力，好想分享我哋嘅一份小喜悅，為大家圖添正能量，今日…又係美好嘅一天！